Galler Thrane gård på Austrått ved Sandnes er klart for separatutstilling mai 2012 - det gler eg meg veldig til. I mellomtida er nokre grafiske bilde lagt ut i galleributikken for salg.
Teknikkane collografi, fotopolymer og Chine collè er representerte her.
Collografi - djuptrykksteknikk der plata er laga av kartong og bearbeidd med ulike former for struktur; enten ved å lima ting på plata som gir overflatestruktur, eller ved å ripa i plata, som kan minna meir om etsing eller koldnål (i metall). Prinsippet er at det er varierte former for struktur, som også kan dannast t.d. ved hjelp av å teikna med lim. Derette blir plata forsegla med lakk. I mitt tilfelle er kvart trykk berre eitt eksemplar av kvart bilde (merka I/I , altså èin av èin). Dette kan gi stor variasjon i farge og uttrykk.
Fotoplymer er ein heilt annan teknikk, der trykkplata er belyst med UV-lampe, og eksponert med hjelp av transparent med foto eller anna svart/kvitt-mønster. Denne plata kan brukast til mange fleire nesten identitske trykk, men også her eksperimenterer eg heller med forskjellar.
Chine collè er ein kinesisk metode der tynne lag med papir som er trykt, teikna eller malt på, blir limt over trykket med heimkokt rislim. Kombinasjonar av collografi/chine collè går igjen, men også kombinasjon med fotopolymer.
Alle desse teknikkane er nokså ukjende her i landet førebels, men det vil sikkert bli meir kjent etter kvart. Dei klassiske teknikkane tresnitt, litografi, linoleum, koldnål m.m. er arbeidmetodar eg brukar, men for tida er det dei nye og eksperimentelle arbeidsmåtane som "får gjennomgå". Ein stor fordel med dei er også at det er svært miljøvennleg. Det er trykkfarge i olje som blir brukt (Charbonelle), men reingjeringa går i stor grad føre seg med matolje og eddik.